Die Helpmekaar bestaan tans uit twee entiteite: die Helpmekaar Studiefonds (HSF) staan lenings toe, terwyl die Helpmekaar Studiefonds-Trust (HSFT) rentebeurse beskikbaar stel aan behoeftige studente wat bestaande lenings het.

 

Lenings (HSF)

Die Helpmekaar se rentekoerse vir studielenings is waarskynlik billiker as die meeste ander instansies in Suid-Afrika wat studiehulp verleen. Lenings word hoofsaaklik toegeken vir studie aan universiteite en universiteite van tegnologie, maar sowat 12,3% van die geld gaan ook vir studie aan kleiner geakkrediteerde instellings.

Die HSF beskou egter nie sy rol as afgehandel sodra die leningsooreenkoms onderteken is nie. Daar is deurlopende betrokkenheid by studente en hul ouers, wat lei tot ’n uitstekende akademiese sukseskoers.

Die Helpmekaar Studiefonds staan lenings vir die volle duur van ’n kursus toe. Rente is betaalbaar gedurende die studietermyn en die terugbetalingstermyn is dubbel dié van die studietydperk, met ’n maksimum van sewe jaar. Dit beteken dat ’n student na die voltooiing van ’n driejaar-kursus, ses jaar het om die lening terug te betaal. Na ’n vierjaar-kursus het die student egter slegs sewe jaar om die lening terug te betaal. Afgestudeerdes kry ’n grasieperiode van drie maande voordat die delging van lenings begin. Die fonds maak ook jaarliks meriete-toekennings aan die vyf beste cum laude-studente, terwyl die toppresteerder ook die gesogte Helpmekaar-medalje ontvang.

Laai ons inligtingspamflet af

Inligtingspamflet

 

Laai ons inligtingspamflet vir skole en onderwysers af

Inligtingspamflet vir skole

 

Versoek gedrukte pamflette vir jou skool: bemarking@helpmekaarfonds.org

 

Rentebeurse (HSFT)

In 2005 is die Helpmekaar-Studiefonds Trust gestig om ’n groter mate van ondersteuning te gee in verdienstelike gevalle waar belowende studente deur moeilike finansiële omstandighede aan bande gelê word.

Rentebeurse word slegs aan bestaande Helpmekaar-leninghouers toegestaan. Enkele volbeurse word ook toegestaan na gelang van beskikbare skenkings en fondse.

 

Administrasie van ander fondse

Benewens die lenings wat aan Helpmekaar-studente toegestaan word, administreer die Helpmekaar ook verskeie ander fondse, waaronder die personeelstudiefondse van maatskappye soos British American Tobacco en Distell. Die keuring van hierdie leningsaansoeke word deur die ondernemings self gedoen. In 2015 het die Helpmekaar ongeveer 243 lenings van ander maatskappye geadministreer, wat ’n kapitale belegging van ongeveer R9m verteenwoordig.